ពេលវេលាជាវត្ថុដ៏មានតម្លៃបំផុតក្នុងជិវិតមនុស្ស។ គេតែងប្រៀបធៀបពេលវេលាទៅនឹងមាសប្រាក់។ តាមពិតពេលវេលាមាន តម្លៃខ្លាំងជាងមាសប្រាក់ទៅទៀត។ ពេលវេលាគឺជាជីវិត។ មនុស្សម្នាក់ៗ មានពេលត្រឹមតែ ២៤ ម៉ោងប៉ុណ្ណោះក្នុងមួយថ្ងៃ ហេតុដូច្នេះ គេពុំគួរយកពេលវេលាទៅខ្ជះខ្ជាយចោលដោយឥតប្រយោជន៍ឡើយ។ គេគួរប្រើពេលវេលាឲ្យចំគោលដៅ ពោលគឺប្រើពេលវេលាភាគច្រើនបំផុតទៅលើកិច្ចការទាំងឡាយណាដែលផ្តល់ផ្លែផ្កានាថ្ងៃអនាគត។ ការចេះប្រើពេលវេលាឲ្យត្រូវតាមវត្ថុបំណងបែបនេះ គេហៅថា ការវិនិយោគលើពេលវេលា មានន័យថាពេលវេលាដែលចំណាយទៅហើយមិនបាត់បង់អសារឥតការឡើយ គឺនឹងហុចផលអ្វីម្យ៉ាងនាពេលអនាគត។ តើសកម្មភាពណាខ្លះដែលគេអាចចាត់ទុកបានថាជាការវិនិយោគពេល វេលា ?
សកម្មភាពណាមួយដែលធ្វើឡើងដើម្បីឈានទៅសម្រេចវត្ថុបំណងក្នុងជីវិតសុទ្ធសឹងតែជាការវិនិយោគពេលវេលាទាំងអស់។ សកម្មភាពមួយចំនួនខាងក្រោមអាចចាត់ទុកជាការវិនិយោគលើពេលវេលា៖
- ថែទាំសុខភាពផ្ទាល់ខ្លួន
- ថែរក្សា និងលើកកំពស់ស្មារតី បញ្ញាញាណ
- សម្រួចវត្ថុបំណងក្នុងជីវិតឲ្យកាន់តែច្បាស់ឡើង
- ពង្រីកបណ្តាញទំនាក់ទំនង ៖ មិត្តភក្តិ គ្រួសារ មិត្តរួមការងារ អតិថិជន ដៃគូពាណិជ្ជកម្ម បុគ្គលមានសក្តានុពល អ្នកឯកទេសវិជ្ជាជីវៈ
- ចូលរួមវគ្គបណ្តុះបណ្តាល អភិវឌ្ឍន៍សមត្ថភាព
- អានសៀវភៅ ឬអត្ថបទអប់រំដើម្បីបង្កើនចំណេះដឹង
- រៀនសូត្រអំពីបទពិសោធន៍ជីវិតពីមនុស្សក្នុងសង្គម
- សិក្សាស្វែងយល់ពីរបៀបរកប្រាក់ និងសាងប្រភពចំណូលឲ្យបានច្រើន
- រៀនពីរៀបគ្រប់គ្រងពេលវេលាឲ្យកាន់តែមានប្រសិទ្ធភាព
- រៀនពីវិធីវិនិយោគប្រាក់ និងពេលវេលា ។ល។
ចូរវិនិយោគពេលវេលាឲ្យបានច្រើនបំផុត កុំខ្ជះខ្ជាយពេលវេលាចោល។
"មើលពេលវេលាដែលកន្លងផុតទៅ គ្មានពេលណានឹងត្រឡប់វិញបាន...."ចម្រៀងកុមារភាព។
ប្រភព Salarean
